TUMESAMEHEWA NA YESU HATUNA HATIA TENA

Mungu Ametusamehe Kupitia Kristo – Hatuna Hatia Tena.

Andiko Kuu: 2 Wakorintho 5:19 (NEN)

" _Kwamba Mungu alikuwa ndani ya Kristo akiupatanisha ulimwengu na nafsi yake mwenyewe, akiwa hawahesabii watu dhambi zao. Naye ametukabidhi sisi ujumbe huu wa upatanisho."_ 

Utangulizi

Mstari huu unatufundisha kuwa Mungu, kwa kupitia Yesu Kristo, alifanya mpango wa kuwapatanisha wanadamu na nafsi yake. Kupatanishwa huku kulimaanisha kwamba dhambi zetu hazihesabiwi tena dhidi yetu. Kwa hiyo, mtu yeyote aliye mpokea Yesu Kristo hana sababu ya kuendelea kujihukumu au kujihisi mwenye hatia.

Ondoleo la Dhambi

Kupitia kifo na ufufuo wa Yesu, dhambi zetu zilisamehewa. Mungu hakuhesabu tena dhambi zetu dhidi yetu kwa sababu Yesu alizichukua na kuzilipia. Kwa wale walio ndani ya Kristo, Mungu ametufanya kuwa wapya na ametusafisha kabisa. Warumi 8:1 inasema, "Kwa hiyo sasa hakuna hukumu kwa wale walio ndani ya Kristo Yesu." Hii inamaanisha kwamba hakuna tena hukumu au hatia kwa wale ambao wamepokea wokovu kupitia Yesu Kristo.

Kupatanishwa na Mungu

Kupatanishwa na Mungu ni kitendo cha kuondoa uadui na kurudisha uhusiano mzuri. Kabla ya kuja kwa Yesu, tulikuwa mbali na Mungu kwa sababu ya dhambi zetu, lakini kupitia Yesu, tumepatanishwa naye. Warumi 5:10 inasema, "Kwa maana kama tulipokuwa adui zake tulipatanishwa na Mungu kwa kifo cha Mwanae, zaidi sana tukiisha kupatanishwa tutaokolewa kwa uzima wake." Kwa hiyo, sisi ni marafiki wa Mungu tena na hatuna sababu ya kuishi katika hatia.

Msamaha wa Kudumu

Msamaha ambao Mungu ametupatia ni wa kudumu na haurejeshwi. Dhambi zote zilisamehewa mara moja na kwa wakati wote. Waefeso 1:7 inasema, "Katika yeye tuna ukombozi, yaani, msamaha wa dhambi, kwa njia ya damu yake, sawasawa na wingi wa neema yake." Tunaposamehewa, Mungu hatuzikumbuki tena dhambi zetu (Waebrania 8:12). Hii inatupa uhakika na amani kwamba tumefanywa kuwa wapya ndani ya Kristo na hatuna hatia mbele za Mungu.

Mungu Hatuachi Unapokosea

Kuna wakati tunakosea hata baada ya kumwamini Kristo, lakini jambo hili halimaanishi kwamba Mungu ametuacha. Yesu alisema damu yake inatusafisha dhambi zetu na anaendelea kutulea hadi tutakapokomaa na kufikia kimo cha Kristo. 1 Yohana 1:7 inasema, "Lakini tukienenda katika nuru kama yeye alivyo katika nuru, twashirikiana sisi kwa sisi, na damu ya Yesu, Mwana wake, yatutakasa dhambi yote."

Waefeso 4:13 pia inatufundisha kwamba tunakua na kukomaa kiroho hadi tufikie kimo cha Kristo. Mungu anaendelea kutuimarisha na kutulea ili tufikie ukamilifu huo. Kwa hiyo, tunapokosea, tunapaswa kuishi katika neema ya Mungu, tukijua kwamba yeye ni mwaminifu kutusafisha na kutuongoza.

Hitimisho

Yeyote aliye mpokea Yesu Kristo hana dhambi tena kwa sababu Yesu alichukua dhambi zetu zote. Mungu ametupatanisha na nafsi yake kupitia Kristo na ametusamehe kabisa. Hakuna sababu ya kuendelea kujihukumu au kujiona mwenye hatia, kwani Mungu mwenyewe ametufanya kuwa wapya na ametufutia rekodi zote za dhambi. Kama Neno linavyosema katika 2 Wakorintho 5:17, "Kwa hiyo kama mtu yeyote yumo ndani ya Kristo, amekuwa kiumbe kipya; ya kale yamepita; tazama, yamekuwa mapya."

Maandiko ya Kusaidia

Warumi 8:1 - "Kwa hiyo sasa hakuna hukumu kwa wale walio ndani ya Kristo Yesu."

Waefeso 1:7 - "Katika yeye tuna ukombozi, yaani, msamaha wa dhambi, kwa njia ya damu yake, sawasawa na wingi wa neema yake."

Waebrania 8:12 - "Kwa sababu nitakuwa na rehema juu ya udhalimu wao, wala dhambi zao sitazikumbuka tena."

1 Yohana 1:7 - "Na damu ya Yesu, Mwana wake, yatutakasa dhambi yote."

Waefeso 4:13 - "Hadi sote tutakapoufikia umoja wa imani na kumjua sana Mwana wa Mungu na kuwa watu wazima, kwa kufikia  kimo cha ukamilifu wa Kristo"

Mwl Kabenda Balete 

Kingdom Academy Ministries(KAM)

Dar es Salaam 

0743119699